રાત્રિના સમયે, પોતાના મહેલ જેવા ઘરમાં એક અઢળક કરોડપતિ માણસની ઊંઘ સાથે લડાઈ ચાલુ હતી, આ પહેલીવાર નહોતું કે તે માણસને નીંદર ન આવી હોય. અવારનવાર આ કરોડપતિ માણસને નીંદર સાથે લડાઈ થતી.
ભવ્ય મહેલ જેવા ઘરમાં તેને ભૌતિક સુખ સગવડતા માટે બધું જ હાજર હતું, અત્યંત શાંત રૂમ હતો, એસી માંથી આવી રહેલો પવનનો અવાજ પણ જાણે મધુર લાગી રહ્યો હતો, ઉપર રૂમની બહાર રહેલો બગીચો તેમાંથી પસાર થઈ રહેલો શાંત પવન બધું જ અનુકૂળ હોવા છતાં તેને ઊંઘ નહોતી આવી રહી.
બગીચામાં પણ ચક્કર માર્યા પરંતુ તેની ઊંઘ આવવાનું નામ લઈ રહી ન હતી, થોડા સમય પછી તે નીચે આવી ગયો અને ટીવી પાસે રહેલી ગાડીની ચાવી લઈને પાર્કિંગમાંથી ગાડી કાઢી અને બહાર જતો રહ્યો.
રાત્રિના 4 વાગે રોડ રસ્તા જાણે સુમસામ હતા. એક વાહન પણ સામે નહોતું દેખાતું, તે માણસ સૂમસામ રસ્તાઓમાં પોતાની ગાડી હંકારે જતો હતો, એવામાં તેને મન થયું કે એક સિગરેટ પીવી છે.
તેની ગાડીના ડેશબોર્ડ પાસે હંમેશા સિગરેટ પડી રહેતી, સિગરેટ હાથમાં લીધી અને કારમાં રહેલું સિગરેટ લાઇટર તપાસ્યું પરંતુ કશે મળ્યું નહીં.
આજુબાજુમાં ઘણી તપાસ કરી પરંતુ લાઇટર કે બાકસ મળી નહીં, રાત્રિના આ સમયે આજુબાજુમાં બધી દુકાનો વગેરે બધું બંધ હતું એવામાં તેની કાર એક બિલ્ડીંગ પાસેથી જઈ રહી હતી એમાં સિક્યુરિટી કેબિનમાં લાઈટ ચાલુ હતી.
તેને થયું કે એ સિક્યુરિટી કેબિનમાં તેને બાકસ અથવા લાઈટર જરૂરથી મળી જશે. સિગરેટ પીવાની તીવ્ર ઈચ્છા થઈ હોવાથી તેને તરત જ ગાડી ઉભી રાખી અને ચાલીને તે સિક્યુરિટી કેબિન પાસે પહોંચ્યો.
ત્યાં કેબિન પાસે જઈને જોયું તો દૂરથી કોઈ માણસ દેખાઈ રહ્યું નહોતું, નજીક જઈને જોયું તો ત્યાં અંદર એક માણસ બેઠો હતો અને રડી રહ્યો હતો, તેના ચહેરા પર ઉદાસીનતા દેખાઈ રહી હતી.
તે માણસનું ધ્યાન ગયું કે કેબિનમાં બેઠેલો માણસ સામે રહેલા નાના મંદિરમાં જોઈને ભગવાનની સામે રડી રહ્યો હતો. કેબિન પાસે જઈને તેને અવાજ કર્યો એટલે તરત જ ત્યાં ભગવાનની સમક્ષ રડી રહેલો માણસ ઉભો થઈ ગયો.