ઘર જોયા પહેલા લગ્ન માટે હા પાડી દીધી હતી, લગ્ન પછી પહેલી વખત ઘર જોયું તો વહુને પસ્તાવો થવા લાગ્યો કારણ કે...

એક ગામમાં એક ખૂબ જ ધનવાન શેઠ રહેતા હતા, અનેક નોકર તેની પાસે કામ કરતા. આ જ નોકરમાં તેના એક નોકર નું નામ મોહન પણ હતું. મોહન ગામડાની નજીક જ એક કાચા મકાનમાં રહેતો હતો, તેને ત્રણ બાળકો હતા. પરંતુ તેની પત્નીનું અવસાન વર્ષો પહેલા થઈ ગયું હતું.

મોહન તેના ત્રણેય બાળકોનો ઉછેર પોતે જાતે જ કરતો, બધા લોકો ત્યાં મકાનમાં સાથે જ રહેતા હતા. મોહન જે શેઠ પાસે કામ કરતો હતો તે જ શેઠ પાસે તેના બાળકો પણ મોટા થઈને નોકર તરીકે ઘરમાં કામ કરવા લાગ્યા.. દરરોજ સાંજ પડે એટલે બધા મજૂરોને તેમની મજૂરી મળી જતી અને મોહન તેના બાળકો સાથે ઘરે જતો. આ સ્ટોરી તમે justgujjuthings.com પર વાંચી રહ્યા છો.

મજૂરી મળી હોય તેમાંથી તે અને તેના બાળકો રસ્તામાં કોઈ પણ પ્રકારનો નાસ્તો કરી લેતા, ઘણી વખત એવું પણ બનતું કે તેમની પાસે નાસ્તો કરવા માટે પર્યાપ્ત રકમ ન હોય ત્યારે તેઓ ભૂખ્યા રહીને પણ સમય પસાર કરતા. આમને આમ દિવસો વીતતા ગયા તેના બાળકો પણ મોટા થતા ગયા.

એક દિવસ આજુબાજુના પાડોશીઓએ ભેગા થઈને મોહનને સૂચવ્યું કે મોહન હવે તારે તારા મોટા પુત્રના લગ્ન કરાવી દેવા જોઈએ, કારણ કે એની ઉંમર લગ્ન જેવડી થઈ ગઈ છે. થોડા જ સમય પછી સારુ પાત્ર મળી ગયું એટલે મોહને તેના મોટા દીકરાના લગ્ન કરાવી નાખ્યા.

લગ્ન થયા પછી નવી નવી વહુ મોહનના ઘરમાં પ્રવેશ કરે છે, તેના ઘરની આજુબાજુમાં મોટી ભીડ એકઠી થઈ ગઈ હતી. કારણ કે બધા લોકો નવી વહુને જોવા માટે આવ્યા હતા.. ધીમે ધીમે બધા લોકો પોતાના ઘરે જતા રહ્યા અને ભીડ વિખેરાઈ ગઈ.

બધા પોતાની ઘરે જઈ રહ્યા હતા એમાંથી એક વૃદ્ધ સ્ત્રીએ તે નવી વહુને કહ્યું કે બેટા જો તને ક્યારેય કોઈપણ વસ્તુની જરૂર હોય તો મારું ઘર અહીં બાજુમાં જ આવે છે, કોઈપણ વસ્તુ માંગવામાં કે ઘરે આવવામાં જરા પણ સંકોચ રાખતી નહીં.

બધા લોકો જતા રહ્યા પછી નવી વહુએ પોતાના નવા ઘરને નિરાંતે નિહાળ્યું, એ જે ઘરમાં પરણીને આવી હતી તે ઘરને જોયું. જર્જરીત મકાન હતું, ખૂબ જ જુનવાણી હતું, ઝુંપડા જેવું લાગી રહ્યું હતું, ત્યાં થોડા વાસણો લટકાવેલા હતા.

અને ઘરની બહાર એક નાનકડો એવો ચૂલો રાખેલો હતો જેમાં ક્યારેક નાસ્તો ન કર્યો હોય ત્યારે તેમાં ઘરમાં જે પડ્યું હોય તેમાંથી થોડી ઘણી રસોઈ બનાવવામાં આવતી. ઘરની આવી હાલત જોઈને વહુને ખૂબ જ પસ્તાવો થવા લાગ્યો.

તેને ઘર જોયા પહેલા જ લગ્ન કરી નાખ્યા હતા. પરંતુ હવે ખૂબ જ પસ્તાવો થવા લાગ્યો કે તેને કેવી જગ્યાએ લગ્ન કરી નાખ્યા!!! તેને અચાનક જ તેના ગામડે પાછા જવાની ઈચ્છા થવા લાગી. તેને ભાગીને જવાની પણ ઈચ્છા થવા લાગી.

પરંતુ થોડા જ સમય પછી તેને સમજાઈ ગયું કે તેની પાસે જવા માટે બીજી કોઈ જગ્યા નથી. તે પોતે જ વિચારવા લાગી કે તેના પિયરમાં તેની માતા તો જીવતી નહોતી, તેના ભાઈ ભાભી મજૂરી કરતા હતા. ત્યાં જઈને પણ નોકરાણી જેવું જ જીવન જીવવાનું થયું હોત.

તેને બધા વિચાર માંડી વાળ્યા, અત્યંત રડવા લાગી. ખૂબ રડીને અંતે પોતે જ પોતાની જાતને સાંત્વના આપવા લાગી અને શાંત થઈ ગઈ. મનમાં વિચારવા લાગી કે હવે શું કરવું.? આખરે તેને આ નવું ઘર અપનાવવાનો નિર્ણય લઈ લીધો.

જે વૃદ્ધ સ્ત્રી તેમને કામ માટે કહી ગયા હતા તેના ઘરે જઈને તેને પૂછ્યું કે માજી મને એક સાવરણી મળશે? ત્યારે તે વૃદ્ધ સ્ત્રીએ સાવરણી પણ આપી અને સાથે સાથે કહ્યું કે બીજું કંઈ પણ કામ હોય તો મને કહેજે હું પણ તારી સાથે આવીશ.

સાવરણી લઈને ઘરે આવીને વહુ એક પછી એક દરેક વસ્તુ ચોખ્ખી કરવા લાગી, ખૂબ જ અસ્તવ્યસ્ત ઘર હતું જેને ચોખ્ખું કરી નાખ્યું. એકદમ સફાઈ કરીને તે ઘરની બહાર આવી ત્યારે ચૂલા પર નજર પડી.

નજર પડતા ની સાથે ચૂલા ને પણ સાફ કરીને જાણે નવા જેવો કરી નાખ્યો, સફાઈ કરીને ઘરમાં અમુક દીવાલો પર ગાબડા પડી ગયા હતા એટલે દિવાલ ઉપર માટીનું લીપણ પણ કરી નાખ્યું. રસોઈ માટે ઘરમાં કઈ કઈ વસ્તુ પડી છે તે જોવા લાગી.

ઘરમાં માત્ર થોડા કઠોળ જ પડ્યા હતા, બીજું કંઈ જ નહોતું. કઠોળનું શાક કરી નાખ્યું અને હમ સાફ-સફાઈ કરી રસોઈ તૈયાર રાખીને તેના પતિ તેમજ બધા લોકોની રાહ જોવા લાગી.

તેના પતિ સસરા અને બંને દિયર બધા લોકો આવ્યા. ઘરની બહાર રાખેલો ચૂલો જોઈને બધા લોકોને નવાઈ લાગી આવો સ્વચ્છ ચૂલો પહેલી વખત જોયો હતો. કાયમ જે પણ કંઈ મળતું તે ખાઈ લેતા.

ઘરમાં પ્રવેશ્યા એટલે દીકરાની વહુએ કહ્યું કે તમે બધા લોકો હાથ મોઢું ધોઈને સ્વચ્છ થઈને અહીં આવો હું જમવાનું કાઢું છું. બધા લોકો આશ્ચર્યચકિત થઈ ગયા. ઘરમાં પ્રવેશતા ની સાથે ઘરના દ્રશ્ય જોઈને બધા આશ્ચર્યમાં હતા.

વહુએ પાત્રમાં જમવાનું પીરસ્યું જેમાં રોટલી, કઠોળનું શાક હતું. બધા લોકો આવી રીતે ભોજન મળતું જોઈને ખૂબ જ નવીન અનુભવી રહ્યા હતા. જાણે વર્ષો પછી આવી રીતે જમી રહ્યા હોય. આ સ્ટોરી તમે justgujjuthings.com પર વાંચી રહ્યા છો.

બધા લોકો ભોજન કરીને આરામ કરવા માટે જતા રહ્યા, કારણ કે બીજા દિવસે ફરી પાછું વહેલી સવારે કામે પણ જવાનું હતું. સવારે જ્યારે કામ પર જતા હતા ત્યારે વહુએ બધા લોકોને સાથે થોડું ભોજન આપ્યું.

મોહનભાઈ ને વહુએ પૂછ્યું કે, પપ્પા તમે જે જગ્યાએ જાઓ છો, ત્યાંથી શું તમને માત્ર કઠોળ જ મળે છે કે બીજું પણ કંઈ ખાવાનું મળે છે? ત્યારે મોહનભાઈએ જવાબ આપતા કહ્યું કે ત્યાં અનેક પ્રકારનું ભોજન મળે છે પરંતુ મોટાભાગે તેઓ કઠોળ લેવાનું પસંદ કરે છે કારણ કે તે સહેલાઈથી બની જાય છે.

વહુએ સમજાવ્યું કે હવે અલગ અલગ પ્રકારનું અનાજ લઈ આવજો જેથી કરીને અલગ રસોઈ બનાવી શકાય. ઘરમાં ચૂલા માટે ઇંધણની જરૂર હોવાથી સાથે થોડું લાકડા પણ લાવવા માટે કહ્યું હતું.

તેનો પતિ, સસરા અને પતિના બંને ભાઈઓ ફરી પાછા કામે નીકળી ગયા. જ્યારે પણ હવે એ લોકો કામેથી પાછા ફરતા ત્યારે કંઈકને કંઈક અલગ પ્રકારનું અનાજ લઈને આવતા. તે બધા લોકોના મજૂરીમાંથી અનાજની થોડી માત્રા લઈને અલગ રાખતી.

આ અલગ માત્રામાંથી જ્યારે પણ કંઈ જીવન જરૂરિયાતની વસ્તુ લેવાની હોય ત્યારે તેનો ઉપયોગ કરતી. મોહનભાઈ નું ઘર ધીમે ધીમે હકીકતમાં ઘર થવા લાગ્યું. વહુ ધીમે ધીમે ઘરની પરિસ્થિતિને અનુરૂપ રહેવા લાગી અને ઘરમાં પણ અનેક ફેરફારો થવા લાગ્યા.

ગામડામાં ચારે બાજુ નવી વહુના વખાણ થવા લાગ્યા, અને ફરતા ફરતા આ વાત તેનો પતિ જ્યાં નોકરી કરતો હતો ત્યાં પણ પહોંચી ગઈ. એટલે એ શેઠ એક વખત તેઓના ઘરે આવ્યા હતા.

શેઠ જ્યારે ઘરે આવ્યા ત્યારે વહુ તેને પગે પડી અને આશીર્વાદ લીધા, ત્યારે શેઠે પોતાના ખિસ્સામાં હાથ નાખ્યો અને થોડા સમય પછી હાથમાંથી એક સોનાનો ચેન આપ્યો. સોનાના ચેન ને માથે લગાવીને વહુએ કહ્યું કે શેઠ આ અમને શું કામ આવશે?

જો તમારે કંઈક આપવું જ હોય તો અમને થોડી જમીન આપો જેથી અમે નાનકડું એવું મકાન બનાવી શકીએ. વહુ નું વાક ચાતુર્ય જોઈને શેઠ પણ રાજી થઈ ગયા અને રમુજ કરતા કહેવા લાગ્યા કે વાત સાચી છે બેટા પરંતુ જમીન તો હું મોહનને જ આપીશ.

અને આ સોનાનો ચેન હવે તમારો છે, ધીમે ધીમે મોહનભાઈ ના ઘરનું જીવન સુધરવા લાગ્યું. તેનો પરિવાર જીવનમાં આગળ વધવા લાગ્યો. વર્ષો વીતતા ગયા અને તેઓએ નવું ઘર બનાવ્યું. મોહનભાઈના પુત્રોને શહેરમાં મોટી અને સારી નોકરી મળવા લાગી. આ સ્ટોરી તમે justgujjuthings.com પર વાંચી રહ્યા છો.

મોહનભાઈ ને આજે સમજાઈ ગયું કે એક સ્ત્રી જ હોય છે જે પરિવારને ભેગો રાખી શકે છે, અને ઘરગૃહસ્થી સંભાળી અને વ્યવસ્થિત ચલાવી શકે છે. એટલા માટે જ કદાચ કહેવામાં આવતું હશે કે જો સ્ત્રી ઈચ્છે તો ઘરને સ્વર્ગ પણ બનાવી શકે છે અને નર્ક પણ બનાવી શકે છે.

જો આ સ્ટોરી તમને પસંદ પડી હોય તો દરેક લોકો સાથે શેર કરજો, તેમજ આ સ્ટોરીને કમેન્ટ માં 1 થી 10 ની વચ્ચે રેટિંગ પણ આપજો.