કાજલના લગ્ન થયાના માત્ર એક અઠવાડિયું જ થયું હતું.આજે અચાનક જ કંઈક અવાજ સંભળાયો અને તે જાગી ગઈ. બાજુમાં રહેલી ઘડિયાળ માં ગઈ કાલે રાત્રે જ અલાર્મ સેટ કરીને જ સૂતી હતી. કાજલ ઘડિયાળ તરફ ધ્યાન ગયું ત્યારે દેખાયું કે ઘડિયાળમાં અત્યારે નવ વાગી રહ્યા છે.
સમય જોઈને કાજલ તુરંત જ પલંગમાંથી સફાળે જાગી ગઈ, મનોમન વિચારવા લાગી કે ગઈકાલે અલાર્મ રાખ્યું હોવા છતાં કેમ હું વહેલી ન જાગી શકી? ગઈકાલે જ મમ્મીએ કહ્યું હતું કે કાલે સવારે વહેલા જાગી જવાનું છે અને જમવાનું બનાવવાનું છે.
ગઈકાલે સાસુએ કહ્યા પ્રમાણે વહેલા જાગી ને કાજલ ને જમવાનું બનાવવાનું હતું, મહેમાન આવી ગયા હશે અને તે પોતે મોડે સુધી સુતી રહી હવે શું થશે એવા વિચારમાં ને વિચારમાં તરત જ ફટાફટ તૈયાર થઈને ફરી પાછા વિચારોમાં ખોવાઈ ગઈ કે જો સાસુ તેના પર ગુસ્સે થઇ જશે તો?
આવા અનેક વિચારો તેને આવવા લાગ્યા અને અંદરથી તે પોતે અત્યંત ગભરાવા લાગી, કાજલ પહેલેથી જ મોડી જાગવાની ટેવ ધરાવનારી હોવાથી હજુ તેને વહેલું જાગવાનું તકલીફ થતી. એમાં પણ મિત્રો અને સગા-સંબંધીઓએ તેને બધી શિખામણો આપીને કહ્યું હતું એટલે તેને સાસરી નામથી પણ બીક લાગતી.
લગ્ન થઈ ને વિદાય વખતે દાદીએ ફરી પાછું યાદ દેવડાવી ને કહ્યું હતું કે સાસરી છે જરા ધ્યાન રાખીને અને સંભાળીને રહેજે, બને ત્યાં સુધી કોઈને પણ બોલવાનો મોકો ન આપીશ નહીં તો તારે જ સાંભળવું પડશે.
એટલું જ નહીં દાદીએ વહેલા જાગવાની પણ સલાહ આપી હતી, અને સવારે વહેલી જાગી ને તૈયાર થઈને સાસુ સસરા ના આશીર્વાદ લઈને પછી તારા કામે લાગી જજે અને એવું કોઈ પણ કામ ન કરતી જેના કારણે તારે તારા સાસરીમાં નીચા જોવાનું થાય.
દાદીની આ વાતો જાણે ફિલ્મી ઢબે તેના કાનના પડદામાં પડઘા રૂપે સંભળાવવા લાગી. કાજલ તૈયાર થઈને રૂમની બહાર નીકળી રૂમની બહાર નીકળતા ની સાથે બાજુમાં રહેલો અરીસો હતો જેમાં પોતાનો ચહેરો જોઈને યાદ આવ્યું કે ચાંદલો કે સિંદુર તો લગાવ્યું જ નથી.
આદત ન હોવાને કારણે આ બધું તેને યાદ પણ કઈ રીતે રહે? ફટાફટ ચાંદલો શોધવા લાગી અને સિંદુર શોધવા લાગી. ઉતાવળે ચાંદલો કરી સિંદૂર લગાવીને તે પોતે ફટાફટ નીચે જતી રહી. તેના પગથિયા ઉતરવાની ઝડપ જોઈને અને સાંભળીને જ કોઈ પણ કહી દે કે તે કેટલી ઉતાવળમાં છે.