પવન અને માનસી ના લગ્ન થયાને લગભગ 10 વર્ષ થઈ ચૂક્યા હતા, પરંતુ દર વર્ષે મોટા તહેવારો આવે ત્યારે ઘરમાં કંઈક નવી વસ્તુ ખરીદવાનો બંનેને શોખ હતો. અને આ વર્ષે પણ આવનારા તહેવાર માટે એટલે કે થોડા જ દિવસોમાં દિવાળી આવી રહી હતી એટલે દિવાળી માટે શું ખરીદવું તેને લઈને બંને એકબીજા સાથે ચર્ચાઓ કરી રહ્યા હતા.
માનસીએ કહ્યું આ વખતે આપણે એક લિસ્ટ બનાવીએ જેથી કરીને આપણે શું લેવું છે તે સારી રીતે નક્કી કરી શકીએ તેમજ બધી વસ્તુઓ યાદ પણ રહે.
પવન વાત સાંભળીને આ વાત સાથે સહમત થઈ ગયો પરંતુ સાથે સાથે તેને ઓફિસે જવાનું મોડું થતું હોવાથી તરત જ માનસી ને કહ્યું તો જે લેવાનું હોય તેનું લીસ્ટ જલ્દી જ બનાવી લે આજે મારે ઓફિસમાં અડધો દિવસ જવું પડે તેમ છે, પછી અડધા દિવસ પછી આપણે ખરીદી કરવા જઈશું.
માનસી લિસ્ટ બનાવવા લાગી બંને લોકો એક પછી એક વસ્તુઓ લખવા લાગ્યા. લીસ્ટ થઈ ગયું એટલે પવન ઉતાવડો ઘર ની બહાર નીકળતો હતો એટલા માટે ની નજર બહાર હોલ માં બેઠેલા તેની માતા પર પડી.
પવને તેની માતા પાસે જઈને તેની માતાને કહ્યું: મમ્મી અમે લોકો દિવાળી માટે ખરીદી કરવા માટે આજે જવાના છીએ તમારે કાંઈ લેવું હોય તો મને જણાવી દો?
પવનના સવાલનો માતાએ સહજતાથી જવાબ આપતા કહ્યું કે દીકરા મારે તો કાંઈ જોતું નથી.
પરંતુ પવન જાણે તેને પરાણે કહેવા લાગ્યો કે મમ્મી તમે કંઈક તો એવું કહો જે તમને જરૂર હોય, એક પછી એક ઘણી વખત કહ્યા પછી અંતે તેની માતાએ કહ્યું ઠીક છે બેટા તું જ્યારે ઓફિસેથી પાછો આવે તે પહેલા મારે જેટલું લેવું છે તેનું એક લિસ્ટ બનાવી દઉં છું. બસ આટલું લઈ આવજે.
પવન તરત ઓફિસ જવા રવાના થઈ ગયો, ઓફિસનું કામ પૂરું કરીને બપોર પછી રજા લઈને તે ઘરે આવ્યો. ઘરે આવીને તરત જ માતા ને પૂછ્યું મમ્મી તમારું લિસ્ટ તૈયાર થઈ ગયું? એટલે માતાએ તેને એક કાગળ આપ્યો. એ કાગળ લઈને તરત જ પોતાના પોકેટમાં મૂકીને અંદર રૂમમાં ગયો, પત્નીને પૂછ્યું માનસી તું તૈયાર થઈ ગઈ છે? હા સામેથી જવાબ મળ્યો.
થોડા જ સમય પછી માનસી અને પવન બંને વસ્તુઓ ની ખરીદી કરવા નીકળી ગયા. બને તેટલી જલ્દી ખરીદી કરીને આવવાની હતી કારણકે સાંજે પાછા ફરે ત્યારે તેના સંતાનોને પણ ક્લાસીસ માંથી લઈને ઘરે જવાનું હતું.
પવન અને માનસી બંને ખરીદી કરવા નીકળ્યા રસ્તામાં પવને માનસી ને કહ્યું જોયું મેં તો તને પહેલા જ કહ્યું હતું કે મમ્મીને પણ કઈ વસ્તુ લેવી છે પરંતુ એ મને કહી નથી શકતા. અને મેં જ્યારે જીદ કરી તો તેને મને આખું લિસ્ટ બનાવીને આપ્યું છે, માત્ર જમવાનું ભોજન મળી જાય અને કપડા હોય એટલે જ માણસને જીવનમાં કંઈ જરૂર નથી એવું નથી આ સિવાય પણ માણસને ઘણું બધું જોઈતું હોય છે.
માનસી એ કહ્યું હા બસ તમે સાચા છો. પરંતુ પહેલા આપણે આપણા લિસ્ટમાં જે ખરીદી કરવાની છે તે ખરીદી કરીશું, ત્યાર પછી તમે માતાની લિસ્ટની ખરીદી કરી લેજો.
થોડા સમય પછી બજાર આવી એટલે એક પછી એક દરેક વસ્તુઓ લીસ્ટ પ્રમાણે માનસી ખરીદી કરતી હતી. થોડી વસ્તુઓ પવનની પણ હતી એટલે બધી વસ્તુઓ આશરે બે કલાક જેટલા સમયમાં ખરીદી કરીને બંને પાછા ગાડીમાં આવ્યા.
